要揀去邊度玩，相信10個香港人有8個都會揀去日本。日本美食多、靚景多、產品質素無得頂，難怪俘虜咁多港人嘅心。加上日圓匯率近日走勢低迷，令到去日本旅行變得更加吸引。今次MoneyHero就為大家介紹吓日本嘅免稅同退稅制度，等大家可以輕輕鬆鬆喺日本免稅慳住玩，令每一yen都洗得其所。
睇清楚價錢連唔連稅
講到去日本狂買、狂食、嘆世界，最緊要就係玩得夠抵，去過日本玩嘅朋友應該都知道日本設有消費稅GST，目前嘅稅率係8%。因此，日本嘅商品或者服務一般會標示「稅込」、「稅別」、「稅拔」同「本體價格」幾種價格。「稅込」即係已經包含咗8%消費稅嘅價錢，而「稅別」、「稅拔」同「本體價格」就係未計稅嘅價錢。
大家千祈唔好睇少呢8%嘅稅金，正所謂小數怕長計，假設你去日本玩幾日，兩個人加埋消費「本體價格」嘅100,000 yen折合約6,859蚊港紙商品同服務稅金，加加埋埋都要俾成8,000 yen折合約549蚊港紙，都夠兩個人食一餐唔錯嘅晚餐架啦。
一般商品退稅門檻降低
自2016年5月起，日本針對訪日旅客修訂咗退稅制度。修訂嘅重點係一般商品（例如電器、衣物、鞋履、首飾等）嘅退稅門檻，由需要消費超過10,000 yen（稅前價格）降低至只要消費滿5,000 yen（稅前價格）就得。至於消耗品（例如食品、飲品、化妝品、藥物及保健食品等）嘅退稅門檻大致不變，消費滿5,000 yen（稅前價格）就可以。每日嘅退稅上限為500,000 yen。
要提提大家嘅係，一般商品同消耗品要達至免稅，必須各自消費達到5,000 yen(稅前價格)，而唔可以兩種商品夾埋去計算。舉啲簡單例子︰你買一對3,000 yen嘅鞋同一件2,000 yen嘅Tee，兩樣都係一般商品夾埋夠5,000 yen，就可以免稅或者你買4,000 yen藥妝加1,000 yen零食兩者都係消耗品加埋夠5,000 yen又可以免稅啦。但係若果你買一對3,000 yen嘅鞋加2,000 yen零食，因為兩件商品性質不一，而各自消費未夠5,000 yen咁就達唔到免稅嘅條件啦。
4大退稅重點
根據日本觀光廳嘅溫馨提示商品退稅有四大重點。
1)退稅制度下所有商品都可豁免8%稅金，可以話買得愈多愈抵。
2)退稅安排只適用於短期停留(少過6個月)日本嘅旅客。
3)上面講過嘅一般商品免稅門檻降至5,000 yen(稅前價格)。
4)記得要帶埋你本passport，因為喺商店辦理退稅或免稅手續時必須出示護照。
兩大退稅流程
了解咗免稅嘅條件，就等小編講講退稅嘅形式啦。一般黎講，喺日本退稅不外乎兩種流程︰
1)第一種流程多數出現喺時裝店同藥妝店等連鎖店排隊俾錢時，只需直接前往退稅櫃位出示Passport就可以即時豁免稅金直接付出免稅價錢，簡單直接。
2)第二種流程多出現喺百貨公司或者購物中心要先俾錢支付稅込價格再帶埋購入嘅商品、收據、於即日前往同一間店舖或購物中心嘅退稅櫃位出示Passport。如果以信用卡俾錢記得帶埋俾錢果張信用卡咁稅金就會直接喺信用卡扣除。
無論邊個流程，店員都會為你準備一張「購入者誓約書」，俾你喺上面簽番個名。之後店員會準備「購入記錄票」幫你貼落或者釘落本Passport度，最後吸埋印仔。你只要係日本出境時將「購入記錄票」交返去海關嘅回收櫃位或回收箱，咁成個流程就大功告成架啦。如果你買嘅係消耗品，店員會將已免稅嘅消耗品放入特定嘅密封膠袋或者紙箱。係離開日本之前有關膠袋或者紙箱都唔可以開封架。
留意退稅手續費
另外需要留意嘅係，大部份百貨公司都會就退稅收取手續費（大部分為商品免稅售價嘅1.1%），咁會令到大家實質取回嘅金額少咗。小編建議大家去百貨公司購物，特別係購買金額較高嘅商品前，可以去其他有得退稅嘅商店格下價，計吓免稅售價邊度抵啲，咁先至買得夠醒！
日本退稅制度修訂概要
| 一般商品 | 消耗品 | |
|---|---|---|
| 例子 | 電器、衣服、鞋履、手袋、 手錶及首飾等 |
食品、飲品、化妝品、藥物及 保健食品等 |
| 2016年5月前 免稅門檻 |
10,000日圓以上 | 5000日圓以上 |
| 2016年5月後 免稅門檻 |
5,000日圓或以上 | 5,000日圓至500,000日圓 |
| 退稅特定包裝 | 無 | 特定密封膠袋或紙箱 |
想知道更多信用卡嘅優惠資訊？立即使用我哋嘅比較工具，搵出最適合你嘅信用卡！
經我哋申請仲可以獲得額外獎賞現金券，詳情請按此。
——
記得留意我哋 MoneyHero Blog，同埋緊貼我哋嘅 Facebook Page！
The post 「稅込」、「稅別」有咩分別？日本免稅 退稅 全攻略 appeared first on 理財資訊.