話咁快就嚟開學，除咗Reg科同Add/Drop之外，相信 交學費 一定叫唔少同學好頭痛。始終一個Sem嘅學費都要成2萬幾蚊，唔係小數目！不過只要你識得用信用卡交學費，就可以賺返唔少信用卡積分，兌換現金回贈、飛行里數同心水禮品。想知邊幾張卡交學費最著數？立即睇下！（2016年8月更新資料）
信用卡 交學費 小貼士
想用信用卡 交學費 ，首先你要知道你就讀嘅院校或者辦學機構接受邊種繳交方法，好似中大咁，就主要接受以繳費靈、自動櫃員機（ATM）、銀行網頁同銀行櫃檯4種方法交學費。不過，有部分銀行信用卡（例如DBS同永隆銀行）有標明獎賞計劃唔適用於網上繳費，所以交學費前都係要睇清楚條款。
此外，一般大學生用嘅信用卡通常只有$10,000信用額，但只要你預先將錢存入信用卡戶口就可以照樣用信用卡交學費喇！以下就等MoneyHero.com.hk為大家介紹幾張交學費賺積分嘅好卡啦！
1）恒生信用卡
城大、浸大、中大、中大專業進修學院同恒生管理學院嘅同學要留意！由即日起至2017年6月30日，只要先電話登記，再用大學/大專聯營信用卡報讀本地/同海外各大院校同辦學機構舉辦嘅課程，就可以賺取3倍Cash Dollar，即係1.2%回贈！呢個優惠除咗大學課程之外，持續進修基金認可嘅課程亦同樣適用，想知多啲，可瀏覧持續進修基金。如果你用信用卡支付本地同海外公開考試費用，或者於本地/網上書店消費，更可以賺取5倍Cash Dollar添（即係2%回贈）！按此了解詳情。
用其他恆生卡交學費都可以賺Cash Dollar，每簽$250就有1 Cash Dollar，即0.4%回贈。鍾意換現金禮券嘅，最平可以用39 Cash Dollar（即係簽$9,750）可以換到一張東海堂$50禮餅券，計番即係每簽$195可賺$1，都有0.5%左右回贈。
2）建行信用卡
用建行信用卡（例如香港航空Fly Away信用卡、Visa 白金卡同Eye卡）交學費 ，每簽$1就有1分，25,000分可換$100現金回贈或者萬寧、一田同惠康等商戶$100現金券，計落都有0.4%回贈。
另外，建行卡客戶亦可以將積分轉成「亞洲萬里通」飛行里數，每15分=1里（即$15=1里），又或者換香港航空「Fortune Wings Club金鵬積分」，每6分信用卡積分=1分「金鵬積分」（即$6=1里）。
3）HSBC信用卡
用HSBC白金或以上級別嘅信用卡（包括Visa Signature卡同白金Visa卡）透過e-banking交學費，每簽$250就有$1「獎賞錢」，而每$1「獎賞錢」可當作$1使用，計番即係0.4%回贈。至於白金以下信用卡（例如HSBC金卡）就要親自到有關院校機構碌卡，又或者登入學校網站交至賺到獎賞錢，e-banking係唔計嘅。鍾意儲里數嘅話可以登記埋HSBC嘅「飛行優惠計劃」，每$1「獎賞錢」換10里飛行里數，計番即係$25=1里。
相關閱讀：【準大學生必讀】申請 Grant Loan 常見問題Q&A
4）富邦信用卡
雖然而家富邦嘅星期六日簽賬2倍積分優惠唔再適用於網上繳費交易，但用富邦白金/ Titanium信用卡透過ebanking交學費，每簽$1都可以賺到1分獎賞，用5,000分就可以兌換$20現金回贈，即0.4%回贈，如果有白金卡或Titanium卡更可以用20,000分換$100現金回贈，即係有成0.5%回贈！
5）中銀信用卡
中銀信用卡設有網上繳費服務，用嚟繳交學費，每$1可賺1分簽賬積分。每25,000簽賬積分可以換$100指定禮券∕現金券，即0.4%回贈！不過要留意，呢個優惠只適用於中銀Visa Infinite卡、白金卡同銀聯雙幣鑽石卡等中銀信用卡，而且限定每個持卡人（包括附屬卡賬戶）一個月最多可賺10,000分，就算你交2萬幾蚊學費都係最多賺10,000分，相對冇咁著數！按此了解詳情。
6）中國工商銀行（亞洲）信用卡
用工銀亞洲信用卡簽賬，每簽$1就有1分，儲夠分數可以換現金回贈、飛行里數同現金禮券。25,000分可以換到$100現金回贈，計落都有0.4%現金回贈。有儲開香港航空「金鵬俱樂部」飛行里數嘅朋友亦可以每10分換1里數，即係$10=1 里。
相關閱讀：【入U即申請】嚴選-大學生必備信用卡
7）中信銀行（國際）信用卡
用信銀國際金卡或普通卡簽賬，每簽$1即賺1分，儲夠積分可換現金禮券，而且積分有效期長達2年，方便你慢慢儲分！每12,500分可換各大商戶嘅$50現金禮券，計番都有0.4%回贈。如果你有信銀國際CITICfirst白金卡或者信銀國際白金卡，更可每簽$180賺$1回贈，即0.55%現金回贈！
想知道更多信用卡嘅優惠資訊？立即使用我哋嘅比較工具，搵出最適合你嘅信用卡！
——
延伸閱讀：2016大專生 Notebook優惠 全面睇（理工大學篇）
延伸閱讀：10大平靚正 派對 包場好去處
想知道最新嘅理財貼士，就要留意 MoneyHero.com.hk Blog！同埋緊貼我哋嘅 Facebook Page！
The post 【開學倒數】 交學費 儲積分必備信用卡 appeared first on 理財資訊.