市面上大部分信用卡都係送「現金回贈」或「里數」，回贈機制多數比較簡單，例如本地簽賬2%回贈、海外簽賬$4=1里咁。雖然，HSBC匯豐嘅「最紅自主獎賞」計劃比較複雜，但如果識玩，隨時賺到$1.79=1里或高達5.6%現金回贈！Moneyhero.com.hk 為大家拆解「最紅自主獎賞」計劃，幫你揀張最適合你消費模式嘅HSBC匯豐信用卡！
首先了解何謂「獎賞錢」
「獎賞錢」計劃係HSBC匯豐信用卡獨創嘅回贈方案，簡單計算︰
$1「獎賞錢」= $1現金 = 10里（即$25=1里）
（每消費$250可獲得$1「獎賞錢」）
咁「獎賞錢」有咩用？
- 繳付信用卡賬單
- 兌換商戶現金券
- 兌換「亞洲萬里通」里數 / Executive Club英航會員俱樂部 / 新航獎勵計劃KrisFlyer里數（須先付$300年費）
HSBC匯豐總共出咗7張卡，包括︰匯豐卓越理財信用卡、匯豐運籌理財白金Visa 卡、匯豐Visa Signature卡、匯豐白金Visa 卡、匯豐銀聯雙幣信用卡、匯豐銀聯雙幣鑽石卡及匯豐財金卡。咁究竟邊張卡最好用？
HSBC匯豐Visa Signature 卡︰中產外遊必備卡
| 獎賞 | 外幣 | 餐飲 | 網購 |
| 基本獎賞(1X) | 0.4% | 0.4% | 0.4% |
| 最紅自主獎賞(5X) | 2% | 2% | – |
| 獨家額外獎賞(3X) | 1.2% | 1.2% | 1.2% |
| 最紅網購及海外簽賬獎賞(5X) | 2% | – | 2% |
| 合共 | 5.6% | 3.6% | 3.6% |
HSBC 匯豐Visa Signature卡嘅回贈優惠最複雜，亦都係最高回贈比率嘅一張卡，只要你將「最紅自主獎賞」中的5X「獎賞錢」分配於「賞世界」，就可以獲得14X積分（5.6%現金回贈 / 1.79=1里），即使扣埋1.95%海外簽賬手續費，仍有3.65%回贈，冠絕市面上咁多張卡。即使將選擇咗「賞世界」，其他簽賬一律仲有1.6%回贈（基本+獨家額外）！
呢張卡另一強項係「餐飲」同「網購」簽賬回贈，同樣有3.6%，比其他信用卡高。同樣地，其他簽賬一律都有1.6%回贈。唯一可以挑剔係佢嘅八達通增值回贈，只有0.4$基本回贈，不過，最近佢同八達通推出咗個限時優惠︰
- 2月28日前，憑卡成功申請「八達通自動增值」服務
- 致電8228 2220登記
- 2018年3月31日前增值一次
- 獲得$100回贈
此外，使用Smart Octopus將八達通功能加入手機，再響3月31日前增值一次，額外再獲$150回贈，總共$250。計返條數，大多數信用卡八達通自動增值回贈都係1-2%，即係增值$25,000或12,500先拎到$250回贈，今次個優惠真係十分吸引！
總結︰呢張卡嘅門檻比較高，年薪要求48萬港元或者資產達60萬港元先申請得，但就十分適合成日去旅行、飲飲食食同網購人士。
HSBC匯豐雙幣銀聯卡︰6萬年薪入門卡
HSBC共有2張卡只需6萬年薪就可以申請，但點解會推介HSBC匯豐銀聯雙幣信用卡而唔係HSBC匯豐匯財金卡？好簡單，就係因為外幣交易手續費！如果兩張卡都選擇「賞世界」︰
| 獎賞 | HSBC匯財金卡 | HSBC銀聯雙幣卡 |
| 基本獎賞(1X) | 0.4% | 0.4% |
| 最紅自主獎賞(5X) | 2% | 2% |
| 最紅網購及海外簽賬獎賞(5X) | 2% | 2% |
| 外幣交易手續費 | 1.95% | 1% |
| 合共 | 2.45% | 3.4% |
如果選擇「賞世界」呢個範籌，HSBC匯豐雙幣銀聯卡有3.4%現金回贈，的確稍勝一籌。再比較「賞中華」，因為銀聯卡免收人幣交易手續費，HSBC匯豐雙幣銀聯卡嘅2.4%回贈同樣比HSBC匯財金卡嘅0.45%高。
要去到用美金結算，HSBC匯財金卡先至比較著數，因為呢張卡免收美金交易手續費，可獲2.4%回贈。
如果選擇「網購」或者其他最紅自主類別，兩張卡都有2.4%回贈，而其他消費則可獲0.4%基本回贈。八達通自動增值回贈方面，呢兩張卡同樣可以享有$250限時優惠回贈！
總結︰呢張卡嘅門檻低，年薪要求6萬港元就申請得，十分適合成日去中國及外地（美國除外）旅行人士。
HSBC匯豐雙幣銀聯鑽石卡︰入Lounge卡
HSBC匯豐雙幣銀聯鑽石卡係匯豐雙幣銀聯卡嘅「高級版」，佢嘅獎賞錢玩法同銀聯卡一樣，外幣簽賬可獲3.4%回贈，唔同嘅地方只係，呢張卡多咗幾項鑽石卡獨有嘅禮遇優惠。當中包括︰
- 免費享用香港國際機場(East Hall and West Hall) 及澳門國際機場環亞機場貴賓室服務3次
- 以優惠價每程港幣250元尊享機場跨境豪華轎車接
- 全線Cinema City週五及六戲票買1送1優惠
- 尖沙咀凱悅酒店希戈餐廳 三道菜午餐/ 六道菜經典晚餐 買一送一* (優惠期至3月31日)
- 帝苑酒店美饌優惠低至8折
總結︰呢張卡嘅門檻唔算高，年薪要求15萬港元就申請得，大部分打工仔都合資格，十分適合經常去旅行同鍾意享用機場貴賓室嘅人士。
揀「最紅自主獎賞」計劃類別要睇消費習慣
「最紅自主獎賞」計劃嘅消費類別包括「賞滋味」、「賞玩樂」、「賞家居」、「賞品味」、「賞中華」及「賞世界」。「賞滋味」、「賞中華」及「賞世界」分別指香港餐廳食肆簽賬、中國簽賬及海外簽賬，沒有特別商戶名單。
不過，如果你選擇「賞玩樂」、「賞家居」或「賞品味」，就需要睇返響邊啲商戶消費先賺到5X獎賞錢。
- 賞玩樂︰MCL 院線、AMC Pacific Place、百老滙院線、Neway、RedMR紅人派對、昂坪360、購票通、3HK等
- 賞家居︰百住、惠康、萬寧、百老匯、豐澤、宜家家居等
- 賞品味︰Uniqlo、AEON、Agnes b、SOGO、一田、國泰、大眾等
留意返，整個計劃須預先登記，推廣期為2018年1月1日至12月31日，同埋只有首100,000港元簽賬可獲享額外「獎賞錢」。
相關文章：【信用卡攻略】香港5大 現金回贈 Cash Back 信用卡
相關文章︰【信用卡攻略】 儲飛行里數 必備信用卡
想了解更多不同信用卡的優惠？即刻上我哋嘅比較平台。
想知道更多信用卡優惠，即上MoneyHero信用卡比較平台，或留意 MoneyHero.com.hk Blog，同埋緊貼我哋嘅 Facebook Page！
The post 【賺盡14X獎賞錢！】HSBC匯豐信用卡最紅自主獎賞攻略 appeared first on 理財資訊.