真·著數？現金回贈信用卡大剖析

用信用卡有策略地咁去儲分、儲里數，好多人都知同識玩，玩得好叻嘅亦不在少數。但係同一時間，對於好多不問世事嘅現金族嚟講，其實信用卡好大程度上只係因為某啲生活環節度佢「要」一張信用卡去俾某啲嘢時先用嘅支付工具，即使佢哋銀包有信用卡，但最後無論係去餐廳食飯埋單，定係每日搭車用果一張八達通增值，都係用之前去ATM撳定嘅大牛同埋紅衫魚出嚟找數。

積分同里數響現金族嘅生活中，既虛無，又飄渺。平時唔多用卡，積分里數儲嚟結果無換到啲乜嘢，積分里數到頭來都只係過期蝕走咗。

不過優惠虛無飄渺絕對唔等於無著數等住現金族嘅！

市面上其實都有好幾張標榜「現金回贈」嘅信用卡，「現金回贈」響呢個層面，就係找下個月結單卡數時找少啲。對於平時少用信用卡嘅現金族嚟講，可以咁樣解釋：駛一百蚊只係找九十幾蚊卡數，又唔駛怕積分里數過期，唔駛諗唔駛記唔駛上網換禮物轉里數打電話出機票。雖然現金族結果都係要現金找卡數，但係卡數即時（或者幾十日之後響月結單上面）真係慳咗，都不失為一個好好嘅選擇。

現金回贈信用卡好多時個回贈金額都唔會輸俾儲積分、里數嘅信用卡，最低嘅現金回贈卡，每$250消費就找$1卡數，即係有0.4%回贈額，其實都已經同市面上絕大部份信用卡嘅基本優惠相同。DBS Eminent Card、大新One+信用卡同安信EarnMore白金卡就做到每$100就回贈$1，回贈率就有足足1%；而DBS Eminent Card就響網上外幣簽賬同海外銷費時有多1%回贈；大新One+卡就響連結咗AndroidPay之後，用手機俾錢時回贈多1%。令到個回贈率推到去2%！另外，安信最近推出嘅WeWa信用卡，除左0.4%嘅基本回贈外，響指定消閒娛樂類別商戶消費嘅話，更可以做到每$250回贈$10添！

不過，現金回贈信用卡亦唔係無弱點──例如，大部份嘅回贈金額係有比儲積分同里數嘅卡嚴格嘅條件，除左現金透支、貸款分期一類無回贈之外，部份卡連免息消費分期都無得計落現金回贈。同時，高回贈率嘅現金回贈信用卡，佢哋嘅不定期特別消費優惠一般嚟講都會比普通信用卡少，甚至無添！雖然就咁睇落去條件好似苛刻左啲，但係如果你係本身都唔會用到免息分期購物嘅現金族、或係唔想計住就住用卡、又或者唔想俾各種優惠登記、兌換手續煩嘅朋友嚟講，差別唔係咁大，因為去到每個月找卡數時其實都係俾少咗錢嘅～

延伸閱讀：信用卡獎賞：飛行里數 Vs 現金回贈，邊樣抵啲？

(*根據2017年3月14日的市場資訊)

按此查看更多花旗銀行、美國運通及DBS等銀行的信用卡產品資訊。

延伸閱讀：嚴選八達通自動增值最佳信用卡

立即再睇睇我哋嘅信用卡攻略大全，睇晒每張卡嘅回贈比率同飛行里數兌換率等等資訊，又或者去我哋嘅比較平台，所有信用卡資料一目了然！

想知道最新嘅理財貼士，就要留意 MoneyHero.com.hk Blog，同埋緊貼我哋嘅 Facebook Page！

The post 真·著數？現金回贈信用卡大剖析 appeared first on 理財資訊.