係人都知暑假係旅遊旺季，機票酒店特別貴。不過，如果你有儲開「亞洲萬里通」里數，就可以用里數免費兌換機票同酒店，慳番唔少錢。但講到點儲里數 、換機票，大家可能仲有種種疑問，例如旺季換機票係咪需要多啲里數？係咪坐國泰機至儲到Asia Miles？今日就等MoneyHero為大家講解。
其他旅遊心得：里數攻略大全｜機場貴賓室介紹｜賺里數攻略 ｜銀聯Lounge｜機場接送｜機場快線｜里數換票｜儲里數方法｜往返內地交通
儲里數篇
1）係唔係淨係坐國泰先有得儲「亞洲萬里通」里數?
只要你搭嘅係「亞洲萬里通」夥伴航空公司航班，就可以儲到里數喇！佢哋嘅夥伴航空公司除咗國泰航空外，仲包括英國航空、港龍航空、日本航空、卡塔爾航空同美國航空等。當然，大家記得要喺訂機票嗰陣說明會員號碼，辦理登機手續時出示會員卡，咁至能夠賺到里數。不過要留意，部分聯號航班係儲唔到里數，例如中國國際航空營運嘅港龍航空聯號航班就賺唔到里數。
除咗搭夥伴航空公司航班外，惠顧「亞洲萬里通」嘅合作商戶亦可以賺到飛行里數。有啲儲里數方法真係估佢唔到，想知更多，即睇：10個你未必知的儲里數方法。
2）如果我幫屋企人買機票，我可唔可以賺取里數？
唔可以，只有乘搭航班嘅會員本人，先至可以賺到里數。
3）賺取里數係根據實際飛行哩數定用機票價錢計？
簡單嚟講，買機票賺取嘅里數係用你實際飛行哩數，再根據你所乘搭嘅客位級別同票價按唔同比例計算嘅，客位級別愈高，計算比例亦愈高：
- 頭等客位 = 實際飛行哩數嘅 150%
- 商務客位 = 實際飛行哩數嘅 125%
- 尊尚經濟客位 = 實際飛行哩數嘅 110% 或 50%
- 經濟客位 = 實際飛行哩數嘅 100%、50%或25%
點解經濟客位計算比例有唔同？原來唔同經濟客位「子艙位」嘅計法各有不同。以國泰為例，乘搭「子艙位」S、N、Q只可賺取實際飛行哩數25%嘅里數，但「子艙位」Y、B、H、K、M、L、V就計100%。假設你坐國泰航班經濟客位去沖繩玩，總共可以賺到1,812里數，但如果「子艙位」係S/N/Q嘅話，就只可以賺454里數，差成4倍。想知道飛一程可以賺到幾多里數，可以利用官網嘅飛行里數計算器計下。
4）我Check In時唔記得咗出示會員號碼，之後有無得數申請補發里數？
想補發里數，就要喺交易後6個月內登入會員賬戶提出申請，同埋要交番機票同登機證正本。至於申請補發非航空夥伴里數，就要交番收據正本。再提提大家，如果喺搭飛機嗰陣買免稅精品或者用膳，記得要拎番張有會員號碼嘅收據，唔係就冇得補發里數。
5）飛行里數就到期點算好？
「亞洲萬里通」里數係以存入月份計起3年為有效期。要兌換飛行獎勵，就一定要喺有效期前使用里數。假如你用唔到，可以喺有效期前於網上將里數有效期延續多3年。網上申請手續費為40美元，其他途徑則收100美元。當然，你亦可以將里數轉贈俾你賬戶內登記嘅「兌換名單」成員，但網上申請同透過其他途徑申請都要分別俾170美元同250美元嘅手續費。
唔想俾錢，但又唔想眼白白睇住啲里數到期？其實你可以將就過期嘅里數轉做「易賞錢」，再用嚟換番做全新嘅飛行里數。假設你有4,000里數，換成「易賞錢」就一共有10,000積分，之後按番每400「易賞錢」積分可以兌換100里數嘅比率，你可以換到2,500全新里數！雖然啲里數少咗近4成，但就唔使俾嗰幾百蚊手續費，就可以幫里數「續命」！仲有，今個月「易賞錢」就推出新優惠，每次你將1,200「易賞錢」兌換做300里數，或者將8,000里數兌換為20,000「易賞錢」積分，都會額外送多你300里數！呢個優惠只係做到6月30日，大家要把握時機！
大家如果平時有用信用卡儲里數，可以揀番啲里數不設積分有限期嘅信用卡，例如渣打亞洲萬里通萬事達卡同美國運通國泰航空尊尚信用卡，咁就唔驚浪費晒啲積分啦！如果換唔切機票，不如用里數兌換自助餐、船飛等禮品同服務，想知更多，即睇：換機票之外，里數仲可以換乜？
換機票篇
6）旺季換機票係咪需要多啲里數？
原則上，換機票所需嘅里數積分係根據獎勵區域同客位級別而定嘅。簡單而言，實際飛行距離愈遠，客位級別愈高，所需里數就愈多，例如由香港飛去曼谷嘅國泰來回經濟客位機票要20,000里，坐頭等客位就要成55,000里，相差2倍有多。
不過係人都知旅遊旺季一票難求，於是除咗一般獎勵機票外，「亞洲萬里通」仲推出咗優越獎勵機票，等你喺旅遊旺季時以更多里數去換取易啲換到嘅機票。用番以上去曼谷嘅例子，如果改換優越獎勵機票級別1，就要35,000里，想有更多機會兌換國泰或港龍機票，就要兌換優越獎勵機票級別2，一共要45,000里。換言之，如果你打算喺旅遊旺季出發，又或者前往旅遊熱點，可能要用更多里數至可以確保換到心儀航班機位。
想知道飛一程要用幾多里數兌換，可以用飛行獎勵搜尋器計下。
溫馨提示：搭飛機去玩之前，當然要未雨綢繆，買番份旅遊保險，咁就萬無一失啦！即上我們的比較平台選擇及購買！
相關文章：【 Starr 旅遊保險 】卓悅遊好唔好？比較三大級別醫療、意外、行李財物遺失及旅程延誤保障
相關文章：【滑雪、潛水買咩旅遊保險？】比較高危活動旅遊保險保障 (附Claim保險方法)
7）如果我想換機票係唔係要早好多個月？
如果你想換港龍同國泰嘅基本來回機票，最遲可以喺航班啟航3小時前直接登入港龍或國泰官網預訂。如果要兌換其他夥伴航空公司嘅獎勵機票，就要填番申請表，通常要預留1星期時間處理。如果你打算喺10日內出發，最好致電「亞洲萬里通」服務熱線。不過，兌唔兌換到機票係視乎機位供應而定嘅，畢竟唔係間間夥伴航空公司都設候補機位，而且獎勵機位數量有限，有時你想要嘅航段同時間都未必有機位，撞正旺季或者旅遊熱點就更難換，所以唔好拖到咁晏至換。穩陣起見，大家最好都係提早半年至一年計劃好行程。
8）其實中途停留（Stop-over）同終斷行程（Open Jaw）係乜嚟？
你或者知道，亞洲萬里通嘅來回獎勵機票容許你喺一段旅程中，喺起點、轉機點或回程點作最多2次中途停留（Stop-over）、2次轉機（Transit）同1次終斷行程（Open Jaw）。
Stop-over係指你飛抵一個城市後喺當地逗留超過24小時至搭另一班機走，停留少過24小時嘅就係Transit。譬如你由香港飛去東京玩幾日，咁就係Stop-over，再由東京飛去大阪玩多幾日，係另一次Stop-over，成段行程總共用咗2次Stop-over。
至於Open Jaw 就係指你去到某個城市，之後喺同一國家內另一個城市返回起點，例如由香港飛抵東京，再由大阪飛返香港。由於目的地（東京）同回程嘅起點城市（大阪）唔同，所以算係Open Jaw，而中間你由東京到大阪呢段行程係要自費嘅。安排行程時如果能夠用盡Stop-over同Open Jaw，就可以一次過去晒幾個唔同城市玩嘞！
9）我同屋企人可唔可以一齊夾里數換機票？
根據「亞洲萬里通」規定，所有兌換航空獎勵里數積分都一定要係同一個會員喺同一賬戶內賺取，所以唔可以將你同屋企人其他賬戶內嘅里數積分夾埋一齊計。
不過，每個會員都可以免費登記5位親友去自己嘅「兌換名單」到，你可以用儲落嘅里數幫佢哋換機票、客位升級、額外寄艙行李限額等獎勵，只須喺結算時輸入番收件人姓名同送遞地址就得。不過登記咗之後，每更改一位「兌換名單」嘅成員都要俾50美元（網上申請）或75美元（其他途徑）嘅手續費。
10）我已經用里數換咗機票，但而家又用唔到，可唔可以取消或者申請退款?
如果你想取消已經兌換嘅獎勵，就要喺獎勵到期前（通常係簽發日計起1年）提出申請，仲要交番120美元，或者扣除12,000「亞洲萬里通」里數。如果想更改旅遊日期，就要交25美元或者用1,000里數積分作手續費。
即上我們的比較平台，比較市面上最佳里數回贈信用卡：
經本網成功申請指定信用卡仲可以獲得額外獎賞現金券，詳情請按此。
——
儲飛行里數點可以冇張好用嘅信用卡呢？睇埋我哋嘅交水電煤費儲 飛行里數 攻略同八達通 自動增值 儲飛行里數攻略，就可以早日儲夠里數周圍飛啦！
睇完都仲係對Asia Miles好多疑問？立即重温我哋嘅：輕鬆儲飛行里數！ Asia Miles 基本攻略！
想知道更多賺里數嘅方法，就要留意MoneyHero Blog，同埋緊貼我哋嘅Facebook Page！
The post 【飛行里數攻略】 儲里數 /換機票10大常見問題 appeared first on 理財資訊.